Pas disa ditësh shumë të vështira në Doha, situata duket se po stabilizohet gradualisht dhe kjo po rrit shpresat që ndeshja e madhe e ‘Finalissima’ të zhvillohet pikërisht në kryeqytetin e Katarit, siç ishte planifikuar fillimisht.

Ditët e fundit kanë qenë shumë të tensionuara, pasi forcat e armatosura të Katarit kanë interceptuar raketa dhe dronë të lëshuar nga Iran. Megjithatë, situata ka filluar të qetësohet pasi Irani njoftoi se do të pezullojë bombardimet ndaj vendeve fqinje, duke theksuar se do të reagojë vetëm në rast se sulmohet nga territori i tyre. Ky vendim ka sjellë optimizëm në Katar dhe reagimet e para kanë qenë pozitive.

Ndërkohë, hapësira ajrore është rihapur pjesërisht gjatë orëve të para të mëngjesit për disa fluturime të posaçme riatdhesimi. Një nga avionët e parë u nis nga Doha drejt Madridit, duke transportuar disa qytetarë që kishin mbetur të bllokuar në vend pas shpërthimit të konfliktit. Në mesin e tyre ishin edhe futbollistët spanjollë Joselu dhe Javi Martínez, si dhe familjarë të tyre dhe persona të tjerë që kishin nevojë urgjente për t’u kthyer në Spanjë.

Autoritetet spanjolle në Katar kanë luajtur një rol të rëndësishëm në këtë proces, veçanërisht ambasadori i Spanjës, Álvaro Renedo, i cili ka ndihmuar në organizimin e riatdhesimit.

Një tjetër sinjal pozitiv është edhe rifillimi i aktiviteteve sportive. Federata e futbollit në Katar ka njoftuar se kampionatet vendase do të rifillojnë nga e enjtja, pasi kishin mbetur të pezulluara për shkak të tensioneve që nisën pas sulmit të Shteteve të Bashkuara të Amerikës ndaj Iranit dhe kundërpërgjigjes së këtij të fundit në rajon.

Gjithashtu pritet që në orët në vijim hapësira ajrore të rihapet edhe për fluturimet e zakonshme tregtare, një proces që po ndodh gradualisht edhe në vende të tjera të rajonit, si Emiratet e Bashkuara Arabe.

Të gjitha këto zhvillime e bëjnë gjithnjë e më të mundshme që ‘Finalissima’ të zhvillohet në Doha, pas rreth 20 ditësh, ashtu siç ishte parashikuar fillimisht.