Një nga figurat më emblematike të futbollit europian, legjenda holandeze Ruud Gullit, ka dalë me një deklaratë të fortë kundër mënyrës se si po zhvillohet futbolli sot. Ish-fituesi i “Topit të Artë” pranoi se ka humbur kënaqësinë për ta ndjekur sportin që e bëri të famshëm.

“Kam vendosur të ndaloj së shikuari futboll. Nuk e shijoj më sportin tonë”, u shpreh ai, duke marrë si shembull ndeshjen mes Arsenalit dhe Chelsea-t. “Çfarë ndeshjeje absolutisht e tmerrshme futbolli!”, theksoi Gullit me tone të ashpra.

Sipas tij, loja moderne është bërë tepër taktike dhe e fokusuar në detaje të vogla, duke humbur spontanitetin dhe kreativitetin. “Shoh lojtarë që përpiqen të fitojnë goditje këndi, që kërkojnë rivënie anësore, shoh djemtë e topave gati me peshqirë. Futbolli është bërë absolutisht i tmerrshëm. Shpresoj që kjo të mos jetë rruga ku po shkojmë”, deklaroi ai.

Gullit theksoi se mungon guximi dhe fantazia në fushë, duke përmendur si shembull pozitiv talentin e ri të Barcelona, Lamine Yamal. “Pres lojtarë që të përballen me mbrojtësit. Ku janë dribluesit? Ku janë ata me guxim? Pse të gjithë vetëm pasojnë? Pasim, pasim, pasim!”, përfundoi ish-‘ylli’ holandez, duke shprehur zhgënjimin për drejtimin që ka marrë futbolli modern.