Tensionet politike në Lindjen e Mesme kanë vënë në pikëpyetje zhvillimin e “Finalissima”-s në Katar.

Organizatorët, UEFA dhe CONMEBOL, po ndjekin me shqetësim situatën e sigurisë, pasi raportimet për raketa të lëshuara nga Iran që kanë fluturuar mbi hapësirën ajrore të Katarit kanë shtuar pasigurinë.

Megjithëse Katari nuk është përjashtuar zyrtarisht si organizator, dy alternativa po analizohen seriozisht: Londra dhe Miami.

Londra shihet si opsion me avantazhe të qarta logjistike dhe sigurie.

Shumica e lojtarëve të Argentinës dhe Spanës aktivizohen në Evropë, çka do të lehtësonte udhëtimin.

Për më tepër, kryeqyteti anglez ka vlerë simbolike për argjentinasit, pasi në vitin 2022 aty u zhvillua edicioni i parë i “Finalissima”-s, kur Lionel Messi ngriti trofeun pas fitores ndaj Italisë.

Nga ana tjetër, Miami ofron infrastrukturë moderne, me “Hard Rock Stadium” që ka përvojë në organizimin e eventeve madhore, përfshirë finalen e Copa America 2024 dhe ndeshje të Botërorit 2026.

Megjithatë, distanca e madhe dhe konteksti gjeopolitik paraqesin sfida.

Vendimi përfundimtar do të varet nga zhvillimet e sigurisë në rajon, ndërsa qëllimi mbetet që “Finalissima” të zhvillohet sipas planit.