Futbolli anglez po përgatitet për një përplasje me organet drejtuese ndërkombëtare, pasi klubet e Premier League-s nuk janë të gatshme të pranojnë të gjitha risitë e propozuara nga International Football Association Board (IFAB). Revolucioni i ri arbitrar, i planifikuar të hyjë në fuqi pas FIFA World Cup 2026, parashikon ndryshime të rëndësishme, sidomos në zgjerimin e kompetencave të VAR-it.

Sipas mediave britanike, klubet angleze synojnë të mos e adoptojnë rregullin opsional që do t’i lejonte VAR-it të ndërhynte për të vendosur nëse një aksion duhet të përfundojë me goditje nga këndi apo jo. Edhe pse kjo risi nuk është ende pjesë zyrtare e rregullores dhe do të testohet fillimisht në Botërorin e verës, drejtuesit e Premier League-s druajnë nga ajo që e quajnë “devijimi i VAR-it”, pra zgjerimi i tepërt i fushës së ndërhyrjes së teknologjisë.

Në vendin ku lindi futbolli, marrëdhënia me VAR-in nuk ka qenë kurrë plotësisht e qetë. Klubet kërkojnë të reduktojnë në minimum ndërprerjet e lojës dhe të kufizojnë ndërhyrjet vetëm në episodet vendimtare si golat, penalltitë dhe kartonët e kuq.

Megjithatë, refuzimi nuk duket total. Rregulla të tjera që do të jenë të detyrueshme nga sezoni 2026/27, si rishikimi në monitor për një karton të dytë të verdhë që çon në përjashtim, mund të pranohen edhe në Angli.

Testi më i madh për “VAR-in e ri” do të jetë pikërisht Botërori 2026 në SHBA, Meksikë dhe Kanada, me sytë e kampionateve më të forta europiane, përfshirë Serie A, të drejtuar nga zhvillimet e ardhshme.