Trajneri i Barcelonës, Hansi Flick, ka deklaruar se skuadra e tij duhet “ta bëjë të pamundurën të mundur” në përballjen e së martës kundër Atletico Madridit, në përpjekje për të përmbysur disavantazhin prej katër golash në gjysmëfinalen e Kupës së Mbretit.

Atletico e befasoi Barcelonën në ndeshjen e parë muajin e kaluar, duke shënuar katër gola që në pjesën e parë, ndërsa katalanasit nuk arritën të gjenin rrugën e rrjetës për herë të parë këtë sezon në një ndeshje kampionati vendas.

Megjithatë, Barcelona, që kryeson renditjen në mbrojtje të titullit në La Liga, nuk është gati të heqë dorë nga synimi për të mbrojtur trofeun e Kupës së Mbretit. “Jemi katër gola pas dhe duhet ta bëjmë të pamundurën të mundur. Ky është objektivi. Nuk është e lehtë, por nuk do të dorëzohemi,” deklaroi Flick në konferencën për shtyp.

Ai theksoi rëndësinë e mbajtjes së portës së paprekur, por shtoi se skuadra duhet të besojë në forcën e saj. “Duhet të besojmë gjithmonë. Për shembull, në çdo pjesë duhet të shënojmë nga dy gola,” u shpreh tekniku gjerman.

Barcelona kryeson listën e golashënuesve në La Liga me 71 gola këtë sezon dhe ka realizuar shtatë gola në dy ndeshjet e fundit. Talenti i ri, Lamine Yamal, shënoi një tregolësh ndaj Villarrealit të shtunën, duke treguar formë të shkëlqyer.

Megjithatë, katalanasit do të jenë pa sulmuesin kryesor Robert Lewandowski, i cili pësoi një frakturë në pjesën e syrit gjatë ndeshjes me Villarrealin. “Duhet ta menaxhojmë mungesën e Lewyt. Humbja e një lojtari si ai është problem, por skuadra po e përballon mirë,” theksoi Flick.

Trajneri përfundoi duke theksuar se çelësi i suksesit do të jetë presioni i lartë, fitimi i dueleve dhe shmangia e humbjes së topit, pasi Atletico është shumë e rrezikshme në kundërsulm. “Duhet të luajmë si një i vetëm, veçanërisht nesër,” përfundoi ai.