Derbi i shumëpritur mes pretendentëve për titull, Drita dhe Prishtina, është mbyllur pa fitues, me rezultatin 1-1.

Takimi nisi me ritëm të lartë dhe me lojë të hapur nga të dyja skuadrat, të cilat krijuan disa mundësi të mira shënimi, por pa arritur të konkretizojnë në fazën përfundimtare. Balanca në fushë ishte evidente, me duele të forta dhe aksione të shpejta në të dyja krahët.

Prishtina kaloi në epërsi në minutën e 43-të falë një supergoli nga Mario Ilievski, i cili realizoi nga rreth 40 metra, duke lënë të shtangur portierin Maloku. Ishte një moment magjik që i dha avantazhin mysafirëve pak para pushimit.

Megjithatë, reagimi i Dritës nuk vonoi. Në minutën e 54-t, Blerim Krasniqi shënoi një gol të bukur për të rikthyer baraspeshën në rezultat, duke ndezur sërish emocionet në stadium.

Deri në fund të ndeshjes, të dyja ekipet patën raste të mira për ta fituar takimin, por mungesa e saktësisë para portës bëri që sfida të përfundojë në barazim.

Pas këtij rezultati, Drita renditet në vendin e dytë me 39 pikë, ndërsa Prishtina mban pozitën e tretë me 37 pikë, duke lënë të hapur garën për titull në javët në vazhdim.