Bodo/Glimt ka shkaktuar befasinë më të madhe të këtij edicioni në UEFA Champions League, duke eliminuar Interin në fazën “play-off” me rezultat të përgjithshëm 5-2 pas dy ndeshjeve.

Pjesa e parë u karakterizua nga ritëm i lartë dhe disa raste të mira për zikaltrit.

Në minutën e 28-të, Davide Frattesi provoi me kokë pas një këndoreje, por portieri reagoi saktë.

Pak më vonë, Piotr Zieliński tentoi nga distanca, me topin që kaloi pranë shtyllës.

Në krahun tjetër, Bodo/Glimt paralajmëroi me Håkon Evjen, por Yann Sommer ndërhyri me siguri.

Fraksioni i dytë solli goditjen vendimtare. Në minutën e 58-të, pas një goditjeje të ndalur nga Sommer ndaj Ole Blomberg, më i shpejti në zonë ishte Jens Petter Hauge, i cili shënoi për 1-0.

Interi pati shansin e artë në minutën e 69-të, por Manuel Akanji goditi shtyllën. Vetëm tre minuta më pas erdhi ndëshkimi: Evjen, i shërbyer nga Hauge, realizoi një gol të bukur për 2-0.

Zikaltrit reaguan me Alessandro Bastoni në minutën e 76-të, që shënoi për 2-1, por ishte tepër vonë për një përmbysje.

Me këtë triumf historik, Bodo/Glimt siguron kualifikimin dhe në fazën tjetër do të përballet me njërën mes Manchester City ose Sporting.

Një mbrëmje për t’u harruar për Interin dhe një kapitull i artë për norvegjezët.

Në takimet e tjera, Leverkusen barazoi pa gola me Olympiacon, duke u kualifikuar pasi kishte fituar 0-2 takimin e parë.

Edhe Newcastle kaloi më tej, duke eliminuar Qarabag.

Anglezët fituan 3-2 në shtëpi, teksa sfidën e parë në Qipro e kishin mbyllur me avantazhin e thellë 6-1.