Sulmuesi francez, Antoine Griezmann, mund të largohet nga Atlético Madridi në fund të sezonit, me klubin e MLS, Orlando City, që ka shprehur interes për nënshkrimin e tij. Sidoqoftë, madrilenët kanë marrë garanci se një largim i mundshëm do të ndodhë vetëm në verë.

Marrëdhënia e mirë midis Griezmann-it, drejtuesve të Atlético-s dhe trajnerit Diego Simeone është një faktor kyç. Të tri palët synojnë të dialogojnë qetësisht për hapat e ardhshëm në karrierën e lojtarit, i cili ka shprehur më parë dëshirën për të përfunduar karrierën në MLS.

Atlético nuk dëshiron të dobësojë skuadrën në këtë moment, veçanërisht duke pasur parasysh mundësinë për të arritur finalen e ‘Copa del Rey’, pas disa vitesh mungesë, dhe luftën për të mbajtur vendin e katërt në LaLiga, që garanton pjesëmarrjen në UEFA Champions League. Griezmann ka kontratë deri në vitin 2027 dhe mbetet një element i rëndësishëm në strategjinë e Simeones.

Klubi i ka bërë të qartë lojtarit se do të mbështesë çdo vendim të tij, por ka kërkuar që Griezmann të njoftojë më parë për një largim drejt MLS, në mënyrë që të planifikohen përforcimet dhe ndërtimi i skuadrës për sezonin 2026/27. Edhe në moshën 34-vjeçare, francezi vazhdon të jetë pjesë kyçe e skuadrës, duke regjistruar këtë sezon 12 gola dhe 2 asiste në 35 ndeshje.