John Fury, babai i ish-kampionit të botës në peshat e rënda, Tyson Fury, është gjobitur pasi nuk ka informuar policinë se kush po drejtonte makinën e tij në momentin e një shkeljeje rrugore.

Sipas raportimeve, makina e tij, një Mercedes 190E i vitit 1992, u fotografua korrikun e kaluar në një segment të autostradës M6, mes Keele dhe Stoke. Gjykata e North Staffordshire dëgjoi se 60-vjeçari nuk kishte dhënë detajet e shoferit brenda afatit ligjor prej 28 ditësh.

John Fury, ish-luftëtar i boksit “bare-knuckle”, nuk ishte i pranishëm në seancë, por e mohoi akuzën. Megjithatë, gjykata e shpalli fajtor dhe e dënoi me një total prej 1,574 paundësh, që përfshijnë 660 paundë gjobë, 650 paundë shpenzime gjyqësore dhe 264 paundë shtesë si tarifë për viktimat. Shuma duhet të paguhet brenda 28 ditësh.

Ndërkohë, një akuzë tjetër që pretendonte se ai kishte drejtuar mjetin në një korsi të mbyllur të autostradës u rrëzua nga gjykata.

Në planin sportiv, Tyson Fury, 37 vjeç, ka njoftuar rikthimin e tij në ring me një duel të planifikuar në Londër në prill ndaj rusit Arslanbek Makhmudov. Në të njëjtën mbrëmje pritet të ngjitet në ring edhe John Fury, i cili do të përballet me ish-kampionin britanik Carl Froch.