Bayerni i Mynihut ka thelluar diferencën në krye të Bundesligës, duke krijuar një avantazh prej nëntë pikësh pas fitores 3-2 ndaj Eintracht Frankfurtit në “Allianz Arena”. Një sukses që konfirmon momentin pozitiv të bavarezëve, ndërsa Frankfurti vazhdon serinë negative në transfertë, duke shkuar në tetë ndeshje pa fitore jashtë fushe.

Skuadra e drejtuar nga Vincent Kompany e nisi takimin me dominim të plotë, duke e mbajtur kundërshtarin të mbyllur në gjysmëfushën e vet. Goli i parë erdhi pas një goditjeje këndi, kur Aleksandar Pavlović realizoi me volej nga jashtë zone. Vetëm katër minuta më vonë, një tjetër këndore solli golin e dytë: Josip Stanišić devijoi në shtyllën e parë dhe Harry Kane dyfishoi me kokë, duke shënuar golin e tij të 27-të sezonal në kampionat.

Edhe në pjesën e dytë Bayerni vazhdoi të krijojë raste, me Michael Olise, Luis Díaz dhe Kane që rrezikuan vazhdimisht. Goli i tretë erdhi sërish nga Kane, i cili realizoi nga distanca me të majtën, duke regjistruar golin e 90-të në Bundesligë.

Megjithatë, fundi i ndeshjes solli tension. Kane shkaktoi një penallti pas një ndërhyrjeje të pavullnetshme ndaj Oscar Højlund dhe Jonathan Burkardt ngushtoi shifrat. Më pas, një gabim i Joshua Kimmich u shfrytëzua nga Arnaud Kalimuendo, që shënoi për 3-2 dhe rihapi sfidën. Frankfurti pati edhe një mundësi të artë me Mario Götze-n, por nuk arriti barazimin.

Në fund, Bayerni ruajti epërsinë dhe mbetet i qetë në krye, ndonëse rënia e ritmit në pjesën e dytë është një sinjal alarmi para përballjes së madhe me Borussia Dortmundin.