Elbasani siguroi një fitore të rëndësishme në transfertë ndaj Vorës me rezultatin 2-1, në një ndeshje të vlefshme për javën e 25-të të Kategoria Superiore. Suksesi i verdhebluve i mban ata pranë kreut dhe rrit ndjeshëm presionin në garën për titull.

Miqtë e nisën më mirë takimin dhe kaluan në epërsi falë golit të Olberkis, duke shfrytëzuar një moment pasigurie në mbrojtjen vendase. Reagimi i Vorës ishte i menjëhershëm: Kasalla riktheu baraspeshën me një realizim spektakolar, që ndezi ritmin e lojës dhe mbylli pjesën e parë në barazim.

Në fraksionin e dytë, Elbasani u shfaq më këmbëngulës dhe kërkoi me ngulm golin e avantazhit. Momenti vendimtar erdhi pas një penalltie të debatueshme, e cila shkaktoi protesta nga vendasit. Pavarësisht kundërshtimeve, gjyqtari i qëndroi vendimit të tij edhe pas konsultimit me VAR-in.

Nga pika e bardhë, Arsen Lleshi u tregua i saktë dhe i dha skuadrës së tij tri pikë shumë të vlefshme. Pas kësaj fitoreje, Elbasani i vendit të tretë afrohet ndjeshëm me kryesuesit, duke mbetur vetëm tri pikë larg Vllaznisë, ndërsa Egnatia ruan një avantazh minimal prej një pike ndaj verdhebluve në renditje.