Në një ndeshje me ritëm të lartë dhe një fund tepër dramatik, Bylisi arriti të mposhtte Vllazninë, duke rihapur plotësisht garën për vedin e parë në kampionatin e Kategorisë Superiore. Fitorja e ekipit ballshiot jo vetëm që forcon shpresat për mbijetesë, por njëkohësisht ndal hovin e skuadrës shkodrane, e cila kishte nisur bindshëm vitin 2026.

Takimi ishte i luftuar që nga minuta e parë. Bylisi u tregua i organizuar në mbrojtje dhe për pjesën më të madhe të lojës ia doli të mbante kundërshtarin larg zonës së rrezikshme. Nga ana tjetër, Vllaznia nuk u shfaq me saktësinë e zakonshme në finalizim, duke hasur vështirësi në krijimin e rasteve të pastra për gol.

Avantazhi i vendasve erdhi në fillimin e pjesës së dytë, kur Stoilov gjeti rrjetën dhe ndryshoi rrjedhën e ndeshjes. Pas këtij momenti, Vllaznia rriti presionin dhe u hodh në sulm në kërkim të barazimit, por pa arritur të konkretizojë rastet e krijuara.

Emocionet kulmuan në minutat shtesë. Fillimisht, shkodranët pretenduan për një penallti, por gjyqtari Rusta vendosi të mos e akordojë, edhe pas rishikimit me VAR. Menjëherë pas këtij episodi, ndeshja shpërtheu me dy gola të shpejtë: Sanago shënoi në portën e boshatisur, ndërsa Tafili realizoi golin e nderit për Vllazninë, duke vulosur një përfundim spektakolar dhe duke i dhënë fund serisë së fitoreve të kryesuesve.