Gennaro Gattuso ka ndezur motorët për sfidën më të rëndësishme të sezonit, duke kontaktuar plot 50 futbollistë në prag të “play-offit” për Kupën e Botës 2026.

Sipas raportimeve të “La Gazzetta dello Sport”, trajneri i Italisë ka zhvilluar takime dhe darka pune me grupe lojtarësh, për të mbajtur skuadrën të bashkuar në një moment kritik.

“Italia” rrezikon të humbasë Botërorin për herën e tretë radhazi, ndaj presioni është maksimal.

“Azzurrët” do të përballen me Irlandën e Veriut në Bergamo më 26 mars, në gjysmëfinalen e “play-off”-it.

Një fitore do t’i çonte në finalen me një ndeshje të vetme jashtë fushe kundër fituesit të çiftit Uellsi – Bosnje-Hercegovina.

Mes emrave të kontaktuar spikasin liderë si Gianluigi Donnarumma, Nicolò Barella dhe Federico Chiesa, por edhe talente të rinj që mund të sjellin energji të re.

Lista e zgjeruar tregon se Gattuso po analizon çdo opsion të mundshëm për të ndërtuar skuadrën më konkurruese.

Me kalendarin e klubeve të ngjeshur, grumbullimi klasik ka qenë i pamundur, por tekniku italian ka zgjedhur rrugën e komunikimit të drejtpërdrejtë për të forcuar frymën e grupit.

Marsin e pret një sfidë “jetë a vdekje” për Italinë – dhe Gattuso duket i vendosur të mos lërë asgjë në dorë të rastësisë.