Barcelona po shqyrton paraqitjen e një ankese zyrtare pas humbjes 4-0 në gjysmëfinalen e parë të Kupës së Mbretit ndaj Atlético Madrid, në një ndeshje të mbushur me polemika arbitrare.

Sipas “Mundo Deportivo”, drejtuesit katalanas janë të revoltuar, veçanërisht për anulimin e golit të Pau Cubarsí në minutën e 52-të për pozicion jashtë loje.

Në atë moment, teknologjia gjysmë-automatike e ofsajdit nuk ishte funksionale dhe vendimi u mor pas një vizatimi manual të vijave që zgjati gjashtë minuta.

Pas ndeshjes, Frenkie de Jong zbuloi se gjyqtarët kishin pranuar probleme me sistemin, duke e cilësuar situatën “skandal” nëse vendimi bazohej vetëm në pamjet e shfaqura.

Tensionet u shtuan edhe për ndërhyrjet e ashpra të Giuliano Simeone ndaj Alejandro Balde, ku katalanasit kërkuan karton të kuq, por lojtari i Atleticos u lejua të vazhdonte lojën.

Edhe Eric García reagoi ashpër, duke theksuar se vendimet e fundit arbitrare kanë qenë vazhdimisht kundër Barcelonës.

Nga ana tjetër, trajneri Hansi Flick u shpreh se mosndëshkimi i hershëm me karton të verdhë ndikoi drejtpërdrejt në rrjedhën e takimit.

Tashmë mbetet për t’u parë nëse klubi katalanas do ta zyrtarizojë ankesën dhe çfarë reagimi do të ketë federata spanjolle pas kësaj stuhie polemikash.