Një situatë e papritur ka tronditur kampin finlandez në Milano-Cortina 2026, teksa trajneri i kërcimit me ski, Igor Medved, është shkarkuar nga detyra pas shkeljes së rregullave të brendshme të ekipit.

Vendimi u mor nga Shoqata Finlandeze e Skive, pasi u konstatua se 44-vjeçari kishte qenë i përfshirë në një incident që lidhej me konsumimin e alkoolit gjatë Lojërave.

Medved kishte udhëhequr Finlandën drejt vendit të gjashtë në garën e përzier ekipore, por aventura e tij olimpike përfundoi menjëherë.

Federata konfirmoi se trajneri është kthyer në atdhe, ndërsa drejtimin e ekipit për pjesën e mbetur të Olimpiadës do ta marrë Lasse Moilanen.

Menaxheri i ekipit, Janne Hanninen, theksoi se shkeljet e disiplinës merren shumë seriozisht dhe reagimi ishte i menjëhershëm.

Megjithatë, federata bëri të ditur se Medved mbetet nën kontratë dhe rasti do të shqyrtohet zyrtarisht pas përfundimit të Olimpiadës.

Vetë trajneri kërkoi falje publike, duke e cilësuar veprimin e tij si një gabim dhe duke i uruar ekipit suksese në vazhdim të garës.