Milan hap javën e 25-të të Serie A me një transfertë të rëndësishme ndaj Pisa-s, sonte, në orën 20:45. Skuadra e drejtuar nga Massimiliano Allegri synon të forcojë vendin e dytë në renditje dhe të afrohet me Interin në garën për titull.

Kuqezinjtë vijnë në këtë sfidë pas shtyrjes së ndeshjes së mëparshme për shkak të ceremonisë hapëse të ‘Milano-Cortina 2026’. Kalendari u ofron milanezëve një mundësi të mirë, pasi rivalët përballen mes tyre. Allegri ka theksuar rëndësinë e këtij turi, duke nënvizuar se një fitore do të ishte shumë e vlefshme. Një lajm pozitiv për Milanin është rikthimi i Christian Pulisic, edhe pse pritet të ketë minuta të kufizuara në dispozicion.

Nga ana tjetër, Pisa e trajnerit Oscar Hiljemark po lufton për mbijetesë. Toskanët kanë ndryshuar trajner pas largimit të Alberto Gilardino-s dhe kërkojnë pikë të rëndësishme për t’u larguar nga zona e rrezikut. Ndeshja e parë mes dy skuadrave përfundoi në barazim, çka e bën përballjen edhe më delikate.

Milan mbetet favorit në letër, por Pisa do të tentojë të shfrytëzojë faktorin fushë për të marrë një rezultat pozitiv.