Prania e Lionel Messit vazhdon të transformojë Inter Miami-n, që tashmë konsiderohet klubi më i vlefshëm në “Major League Soccer”. Afërsisht tri vite pas transferimit të kapitenit argjentinas, skuadra nga Florida po shijon sukses jo vetëm në fushë, por edhe në aspektin financiar.

Pas triumfit historik në “MLS Cup” gjatë vitit 2025, Inter Miami e nis sezonin 2026 si klubi me vlerën më të lartë ekonomike në kampionat. Sipas raportit të publikuar nga “Sportico”, vlera e tij ka arritur në 1.45 miliard dollarë, duke lënë pas Los Angeles FC, që renditet i dyti me 1.4 miliard dollarë. Rritja prej 22% gjatë vitit të kaluar ka qenë vendimtare për këtë kapërcim, shumë më e lartë se rritja e rivalëve direktë.

Një rol të rëndësishëm në këtë zhvillim ka luajtur edhe infrastruktura. Stadiumi i ri i Inter Miami-t, që pritet të inaugurohet këtë vit, ka rritur ndjeshëm potencialin ekonomik të klubit. Në pesëshen më të vlefshme të MLS-së përfshihen gjithashtu LA Galaxy me 1.17 miliard dollarë, Atlanta United me 1.14 miliard dhe New York City FC me 1.12 miliard, ky i fundit duke planifikuar hapjen e një stadiumi të ri në vitin 2027.

Vetëm këto pesë klube e kalojnë pragun e 1 miliard dollarëve, ndërsa mesatarja e vlerës së skuadrave në MLS arrin në 767 milionë dollarë, me një rritje vjetore prej 5%. Në këtë panoramë, ndikimi i Messit mbetet thelbësor, duke e shndërruar Inter Miami-n në një forcë sportive dhe një aset ekonomik të jashtëzakonshëm për të gjithë ligën.