Lionel Messi duhej të shënonte vazhdimisht te Barcelona, përndryshe nuk ishte plotësisht i kënaqur.

Këtë e ka zbuluar ish-shoku i tij i skuadrës, Samuel Umtiti, i cili ka ndarë detaje interesante nga vitet e kaluara përkrah yllit argjentinas në “Camp Nou”.

Fituesi i Kupës së Botës me Francën në vitin 2018 ka luajtur përkrah tetë herë fituesit të Topit të Artë gjatë periudhës 2016–2021, duke qenë dëshmitar i drejtpërdrejtë i mentalitetit të jashtëzakonshëm që e ka bërë Messin një nga futbollistët më të mëdhenj të historisë.

Umtiti kujton se Messi shënonte rregullisht mbi 30 gola në sezon, duke kaluar shpesh edhe shifrën e 50 golave, por pavarësisht suksesit kolektiv, argjentinasi nuk ishte kurrë i kënaqur nëse nuk kontribuonte personalisht me gola.

“Nëse fitonim 4-0 dhe ai nuk shënonte, nuk ishte i lumtur. Në mendjen e tij ishte shumë e qartë: duhej të shënonte gjithë kohën. Kjo është shenja e të mëdhenjve,” u shpreh Umtiti.

Ish-mbrojtësi i Barcelonës e përshkroi Messin jo vetëm si një futbollist të jashtëzakonshëm, por edhe si një person modest, pavarësisht arritjeve të pafundme në karrierë.

“Si njeri, ai është i shkëlqyer. Edhe kur ke fituar gjithçka, e kupton që nuk ka kuptim të ndihesh superior. Ka vetëm një si ai, është Leo,” tha Umtiti. “Në të gjitha nivelet. Vetëm ai është në gjendje të fitojë një ndeshje i vetëm.”

Sipas Umtitit, ajo që e bënte Messin të veçantë ishte inteligjenca e tij unike në fushë dhe aftësia për të lexuar lojën më shpejt se kushdo tjetër.

“Ai është një vrasës para portës. E dinte saktësisht kur të përshpejtonte dhe kur të ngadalësonte ritmin e lojës. Gjithmonë shikonte majtas dhe djathtas, kontrollonte pozicionimin e të gjithëve.”

“Nuk ka recetë për ta mbrojtur Leon. Ai është i paparashikueshëm dhe gjithmonë ka një avantazh në kohë ndaj kundërshtarëve,” përfundoi Umtiti.

Deklaratat e ish-mbrojtësit francez hedhin edhe një herë dritë mbi mentalitetin unik të Lionel Messit, një perfeksionist absolut, për të cilin fitorja nuk mjaftonte kurrë pa firmën e tij personale.