Roma ka arritur një fitore të madhe në Serie A, duke vazhduar garën tashmë për top katërshe dhe kualifikim direkt në Ligën e Kampionëve.

Skuadra e drejtuar nga Gian Piero Gasperini triumfoi 2-0 ndaj Cagliarit, me nga një gol të shënuar për çdo pjesë.

Nënshkrimi i janarit, Donyell Malen shkëlqeu me dy gola në këtë ndeshje, duke konfirmuar formën e mirë që po kalon.

Holandezi shënoi fillimisht në minutën e 25-të, pas asistimit nga Gianluca Mancini.

Me rezultatin 1-0 u mbyll pjesa e parë, teksa në të dytën Roma e shënoi edhe golin e dytë dhe të fitores në këtë ndeshje.

Malen shënoi në minutën e 65-të për 2-0, pasi u asistua nga Zeki Çelik.

Me këtë fitore, Roma shkon në kuotën e 46 pikëve, në vendin e pestë, aq sa ka edhe Juventusi një vend më lart.

Interi e kryeson tabelën me 58 pikë, teksa para Romës janë Milani e Napoli, që zënë pozitat 2 dhe 3.

Cagliari në anën tjetër është në vendin e 12-të me 28 pikë.