Me mbylljen e merkatos dimërore dhe objektivin e respektimit të bilancit financiar në zero, Napoli ka kthyer vëmendjen plotësisht te kampionati, por edhe te një temë po aq delikate: rinovimi i kontratave të shtyllave të skuadrës. Prioritetet janë të qarta dhe emrat në tavolinë janë disa nga më të rëndësishmit e organikës.

Në krye të listës qëndron Scott McTominay, një nga pikat e referimit të skuadrës së Antonio Conte-s. Mesfushori skocez ka një kontratë të vlefshme deri në vitin 2028, por Napoli dëshiron ta zgjasë atë deri në 2030, duke e shoqëruar rinovimin edhe me një rritje të merituar page. Palët janë të qeta dhe klubi synon ta mbyllë sa më shpejt këtë çështje.

Situatë e ngjashme edhe për Franck Anguissa-n. Kamerunasi është pranë rikthimit në fushë pas një ndalese të gjatë, por rëndësia e tij në skemën e Conte-s mbetet e padiskutueshme. Kontrata aktuale skadon në qershor 2027 dhe ideja e Napolit është ta zgjasë të paktën edhe për një sezon, idealisht për dy. Në këtë rast, megjithatë, negociatat janë ende në fazë fillestare.

Më e ndërlikuar paraqitet çështja Stanislav Lobotka-s. Mesfushori është thelbësor për lojën e Napolit dhe klubi e konsideron të pashitshëm, por vetë lojtari, edhe përmes agjentit të tij, nuk e ka fshehur dëshirën për të provuar një eksperiencë tjetër në të ardhmen, çka e vështirëson marrëveshjen për rinovim.

Ndërkohë, më pranë përfundimit është dosja Amir Rrahmani. Mbrojtësi ka bindur prej kohësh drejtuesit dhe baza e marrëveshjes me rrethin e tij është arritur: rinovim deri në vitin 2029, me firmat që priten së shpejti. Një sinjal i qartë se Napoli dëshiron të ndërtojë vazhdimësi, duke blinduar boshtin e skuadrës për vitet në vijim.