Real Madridi vazhdon të jetë në qendër të thashethemeve për ndryshime të mundshme në skuadër, mes largimeve dhe afrimeve të reja që pritet të ndodhin në merkatot e ardhshme.

Në këtë klimë spekulimesh, çdo ditë dalin emra të rinj të lidhur me “Los Blancos”, ndërsa një nga më të përfolurit së fundmi ka qenë Martin Zubimendi, mesfushori spanjoll i Real Sociedadit, i konsideruar si një nga lojtarët më të qëndrueshëm dhe inteligjentë të viteve të fundit në rolin e tij.

Tema u trajtua hapur në emisionin radiofonik “El Larguero”, ku prezantuesi Manu Carreño e ngacmoi Zubimendin për zërat që e lidhin me një transferim të mundshëm në “Santiago Bernabéu”. “Kohët e fundit është folur shumë për ty. Shumë njerëz mendojnë se Real Madridit i duhet një lojtar si Zubimendi dhe për këtë arsye emri yt del këtu çdo tre ditë”, u shpreh Carreño me humor.

Përgjigja e mesfushorit ishte e drejtpërdrejtë dhe pa ekuivoke. “Nuk mendoj kështu. E vërteta është se Real Madridi ka lojtarë më shumë se të mjaftueshëm për të bërë mirë, kështu që jo, absolutisht jo”, deklaroi ai.

Këto fjalë duken se i shuajnë, të paktën për momentin, spekulimet për një transferim të Zubimendit te Real Madridi, duke konfirmuar fokusin e tij te skuadra aktuale dhe respektin për cilësinë që ka mesfusha madrilene.