Një episod i rëndë ka tronditur ambientin zikaltër pas ndeshjes Kremoneze–Inter, ku portieri Emil Audero u godit me fishekzjarr nga sektori i tifozëve të Interit.

Ngjarja nuk ka kaluar pa pasoja dhe tani klubi milanez rrezikon ndëshkime serioze si në aspektin sportiv, ashtu edhe në atë financiar.

Sipas vendimit të marrë deri tani, në tri ndeshjet e ardhshme në transfertë të vlefshme për Serinë A, Interi nuk do të ketë mbështetjen e tifozëve të tij.

Bëhet fjalë për përballjet ndaj Sasuolos, Leçes dhe Fiorentinës, ku sektori i tifozëve zikaltër do të mbetet bosh.

Një goditje e fortë për skuadrën, sidomos në një fazë delikate të sezonit, ku çdo mbështetje nga tribunat ka peshën e vet.

Në këtë moment, vëmendja është përqendruar te vendimi që pritet të marrë gjyqtari sportiv i Serie A.

Raportet flasin për një gjobë që mund të arrijë deri në 50 mijë euro për klubin e Interit, si pasojë e sjelljes së papërgjegjshme të tifozëve. Megjithatë, sanksionet mund të mos ndalen këtu.

Ekziston edhe mundësia që gjyqtari sportiv të vendosë që supersfida Inter–Juventus të zhvillohet pa praninë e tifozëve zikaltër, një skenar që do ta zbehte ndjeshëm atmosferën e derbit të Italisë.

Gjithçka do të varet nga përmbajtja e raportit zyrtar të arbitrit dhe vlerësimi i rrezikshmërisë së incidentit.

Interi tashmë pret me shqetësim vendimin përfundimtar, ndërsa ky episod shërben si një sinjal i fortë se sjellje të tilla po ndëshkohen gjithnjë e më ashpër në futbollin italian.