Fiorentina ka zyrtarizuar afrimin e Daniele Ruganit nga Juventusi, duke forcuar repartin defensiv për pjesën e mbetur të sezonit dhe në vazhdim. Klubi vjollcë ka bërë të ditur se ka siguruar kartonin e mbrojtësit italian në formë huazimi me detyrim blerjeje, i cili do të aktivizohet në kushte të caktuara.

Në njoftimin zyrtar, Fiorentina sqaron se ka blerë të drejtat e kartonit të Ruganit nga Juventus F.C., duke i besuar përvojën dhe stabilitetin e tij mbrojtjes. Rugani ka lindur në Lucca më 29 korrik 1994 dhe është formuar futbollistikisht në akademinë e Empolit, klub me të cilin edhe ka debutuar në futbollin profesionist.

Gjatë karrierës së tij, mbrojtësi italian ka veshur fanellat e Empolit, Juventusit, Rennes, Cagliarit dhe Ajax-it, duke fituar eksperiencë të rëndësishme si në Serie A, ashtu edhe në arenën ndërkombëtare. Në kampionatin italian, Rugani numëron 177 paraqitje, ndërsa ka luajtur edhe 16 ndeshje në Kupën e Italisë dhe 2 në Superkupën Italiane. Në Evropë, ai ka regjistruar 19 paraqitje në Champions League dhe 8 në Europa League.

Palmares i tij është mjaft i pasur, me 5 tituj kampion në Serie A, 4 Kupa Italie dhe 2 Superkupa Italiane, kryesisht të fituara me fanellën e Juventusit. Rugani ka qenë gjithashtu pjesë e Kombëtares italiane, për të cilën ka luajtur në 7 raste.

Me këtë transferim, Fiorentina synon të shtojë siguri dhe përvojë në mbrojtje, ndërsa Rugani kërkon një kapitull të ri, ku të rikthejë vazhdimësinë dhe rolin protagonistik në Serie A.