E ardhmja e Marc-André ter Stegen po merr një drejtim të ri, larg portës së Barcelonës, por pa u larguar nga Katalunja. Sipas medieve spanjolle, portieri gjerman është shumë pranë një transferimi në formë huazimi te Girona, marrëveshje që pritet të vlejë deri në fund të sezonit. Bisedimet mes dy klubeve katalanase janë në fazë të avancuar dhe optimizmi për mbylljen e operacionit është i lartë.

Në moshën 33-vjeçare, ter Stegen nuk bën më pjesë në planet teknike të Barcelonës. Me ardhjen e Hansi Flick në stolin ‘blaugrana’, hierarkitë në portë kanë ndryshuar: zgjedhja ka rënë mbi Joan Garcian si titullar, ndërsa gjermani ka përfunduar në prapavijë, madje pas Szczesny-t. Një rol i tillë është i vështirë për t’u pranuar nga një portier i nivelit të tij, sidomos në një vit kyç për karrierën ndërkombëtare.

Objektivi i madh i Ter Stegen mbetet Kupa e Botës me Gjermaninë, dhe për këtë arsye minutat dhe vazhdimësia janë thelbësore. Edhe trajneri i kombëtares, Julian Nagelsmann, e ka bërë të qartë se aktivizimi i rregullt është kusht i domosdoshëm për thirrjen. Në këtë kuadër, Girona shihet si një mundësi reale për të rifituar protagonizmin.

Skuadra e Girona-s po kalon një sezon të vështirë, me 33 gola të pësuar në 17 javë, duke qenë mbrojtja më e dobët e LaLiga-s. Përvoja dhe autoriteti i Ter Stegen-it mund t’i japin stabilitet një ekipi që lufton për mbijetesë. Për më tepër, afërsia gjeografike me Barcelonën e bën këtë lëvizje më të lehtë edhe në aspektin personal, duke i mundësuar portierit të qëndrojë pranë familjes së tij.