Kenan Yildiz vazhdon të shkruajë histori me fanellën e Juventusit. Me golin e realizuar ndaj Pisa-s, talenti turk ka arritur kuotën e 15 golave zyrtarë me bardhezinjtë, duke barazuar një emër legjendar si Alessandro Del Piero në renditjen speciale të shënuesve Under 21 të klubit. Një arritje që e vendos Yildizin në vendin e gjashtë në klasifikimin historik të Juventusit për këtë kategori moshe.

Në moshën 20 vjeç e 238 ditë, Yildiz jo vetëm që ka arritur Del Pieron, por ka edhe një avantazh të rëndësishëm kohor. Ai ka mbi katër muaj në dispozicion për ta kaluar ish-kapitenin dhe për ta përmirësuar këtë rekord përpara se të mbushë 21 vjeç, një detaj që e bën këtë statistikë edhe më domethënëse. Lajmi është raportuar nga ‘Corriere dello Sport’, që thekson rritjen e vazhdueshme të sulmuesit turk.

Yildiz po konfirmohet si një nga asetet më të çmuara të Juventusit, jo vetëm për të tashmen, por edhe për të ardhmen. Goli ndaj Pisa-s ishte një tjetër dëshmi e pjekurisë së tij në fushë, aftësisë për të marrë përgjegjësi dhe për të qenë vendimtar edhe në momente delikate. Për një lojtar kaq të ri, krahasimi me Del Pieron është një nder i madh, por edhe një përgjegjësi e rëndë.

Në Torino, tifozët po shohin te Yildiz një profil që bashkon talentin, personalitetin dhe instinktin e golit. Rekordet personale po vijnë njëri pas tjetrit, ndërsa emri i tij po lidhet gjithnjë e më shumë me historinë bardhezi. Nëse ritmi aktual vazhdon, Kenan Yildiz jo vetëm që do ta kalojë Del Pieron në këtë statistikë, por mund të synojë edhe kapituj të tjerë të mëdhenj në librin e Juventusit.