Brooke Norton-Cuffy është shndërruar në emrin kryesor në listën e dëshirave të Interit për të zëvendësuar Denzel Dumfries. Zbulimi i këtij sezoni te Genoa ka tërhequr vëmendjen e drejtuesve zikaltër, me Giuseppe Marotta-n dhe Piero Ausilion që e shohin anglezin si profilin ideal për krahun e djathtë.

Dëmtimi i Dumfries, i cili iu nënshtrua një ndërhyrjeje kirurgjikale dhe pritet të mungojë rreth tre muaj, e ka detyruar Interin të kërkojë një zgjidhje të menjëhershme dhe të gatshme në merkato. Fillimisht, opsioni i parë ishte Marco Palestra, një lojtar me perspektivë të madhe, por në pronësi të Atalantës. Marrëdhëniet jo të lehta mes dy klubeve pas dështimit të operacionit Lookman verën e kaluar e kanë bërë këtë pistë më pak të realizueshme.

Për këtë arsye, orientimi drejt Norton-Cuffy-t ka qenë një hap logjik dhe i shpejtë. Anësori i Genoa-s është ndjekur nga afër edhe në ndeshjen e fundit të kampionatit dhe ka bindur plotësisht drejtuesit e Interit, përfshirë edhe stafin teknik, duke u vlerësuar si një profil i përshtatshëm si për të tashmen, ashtu edhe për të ardhmen.

Megjithatë, pengesa kryesore mbetet çmimi. Genoa nuk ka ndërmend ta lëshojë talentin e saj për më pak se 20 milionë euro, një shifër e konsiderueshme sidomos për merkton e janarit. Një investim i tillë kërkon reflektim nga Interi, i cili duhet të balancojë urgjencën sportive me strategjinë financiare.

Ditët në vijim pritet të jenë vendimtare për të kuptuar nëse zikaltrit do të vendosin të bëjnë hapin e madh për Norton-Cuffy apo do të eksplorojnë alternativa të tjera për krahun e djathtë.