Formula 1 do të kthehet në Portugali në vitet 2027 dhe 2028, me garat që do të zhvillohen në ‘Autódromo Internacional do Algarve’ në Portimão. Kjo pistë mikpriti garat e fundit të F1 në vitet 2020 dhe 2021, gjatë periudhës së pandemisë Covid-19.

Manuel Castro Almeida, Ministri i Ekonomisë dhe i Kohezionit Territorial të Portugalisë, njoftoi marrëveshjen me organizatorët e kampionatit: “Portugalia është rikthyer në hartën e Formula 1. Gara e Portugalisë do të ketë një ndikim të drejtpërdrejtë ekonomik, duke krijuar mundësi për të gjithë zinxhirin ekonomik – nga turizmi te tregtia, dhe nga shërbimet te bizneset e vogla – duke promovuar vendin si një destinacion konkurrues dhe të besueshëm. Organizimi i GP-së në Algarve forcon strategjinë tonë të zhvillimit rajonal, duke vlerësuar territoret dhe krijuar mundësi për ekonomitë lokale.”

Stefano Domenicali, President dhe CEO i Formula 1, shprehu entuziazmin për rikthimin në Portugali: ‘Jam shumë i kënaqur që Portimão rikthehet në kalendarin e Formula 1 dhe që sporti vazhdon të ngrejë pasionin e tifozëve tanë të mrekullueshëm portugezë. Pista ofron emocione nga kthesa e parë deri te finishi, dhe energjia e saj ngre tifozët nga vendet e tyre.’

Garat në vitet 2020 dhe 2021 u fituan nga Lewis Hamilton me Mercedes, ku në 2021 ai arriti fitoren e 92-të, duke thyer rekordin historik të Michael Schumacher. Hamilton mbetet piloti i vetëm nga grupi aktual që ka fituar në këtë pistë.

Datat e sakta për garat ende nuk janë të konfirmuara, por rikthimi i Formula 1 në Portugali pritet të sjellë një ngjarje spektakolare për vendin dhe tifozët.