Sipas medieve braziliane, ish-mesfushori i Chelsea, Oscar, ka vendosur të tërhiqet nga futbolli për shkak të një problemi shëndetësor në zemër, i diagnostikuar muajin e kaluar.

33-vjeçari pësoi një rrëzim gjatë një seance stërvitore me São Paulo, ku iu identifikua një gjendje e quajtur ‘sinkopa vasovagale’. Ky problem nuk konsiderohet kërcënues për jetën kur menaxhohet siç duhet, por mund të përbëjë një pengesë për vazhdimin e karrierës profesionale në futboll.

Oscar ka njoftuar tashmë klubin për vendimin e tij, në mënyrë që të planifikojnë sezonin e ardhshëm pa të. Njoftimi zyrtar pritet të bëhet brenda pak ditësh.

Gjatë karrierës së tij, Oscar luajti katër vite e gjysmë te Chelsea, duke shënuar 38 gola në 203 ndeshje dhe fituar dy herë titullin e Premier League, përpara se të transferohej në Kinë në janar 2017 në një kontratë të shtrenjtë.