Momente shqetësuese në St. Moritz për skiatoren zvicerane, Michelle Gisin, dy herë kampione olimpike në kombinimin alpin. Gjatë një seance stërvitore në prag të zbritjes të së premtes, e cila do të hapë sezonin e garave të shpejtësisë në Kupën e Botës për femra, 32-vjeçarja humbi kontrollin dhe u përplas me shpejtësi rreth 112 km/h në rrjetat e sigurisë, pa mundur të ngadalësonte.

Sipas raportimeve të SRF, Gisin qëndroi për disa minuta në anë të pistës, por fatmirësisht pa humbur vetëdijen. Ajo u transportua menjëherë me helikopter drejt spitalit për ekzaminime të detajuara. Federata Zvicerane e Skive nuk ka dhënë ende një diagnozë zyrtare, por frika për një ndalim të gjatë është e pranishme.

“Michelle ishte e vetëdijshme pas rënies. Ajo ankohej për dhimbje në krahun e djathtë dhe në gjurin e majtë”, deklaroi trajneri i skuadrës femërore, Beat Tschuor.

Incidenti solli ndërprerjen e gjatë të provës, e cila në fund u mbyll me kohën më të mirë të regjistruar nga Johana Hählen, me 1'32"70, 13 të qindtat më shpejt se Ester Ledecká. Pas tyre u pozicionuan italianet Sofia Goggia dhe Laura Pirovano, me diferenca prej 21 dhe 22 të qindash.