Liverpool-i mori një fitore tepër të rëndësishme 1-0 ndaj Interit në “San Siro”, falë një penalltie të realizuar nga Dominik Szoboszlai në minutën e 88-të, duke siguruar vetëm fitoren e dytë në shtatë ndeshjet e fundit të fazës së ligës në Champions. Skuadra e Arne Slot udhëtoi drejt Italisë pa Mohamed Salah, i cili u përjashtua nga lista pas deklaratave të nxehta pas barazimit 3-3 ndaj Leeds United, ku akuzoi klubin se e kishte “hedhur nën autobus”.

Inter - Liverpool 0-1

Pavarësisht zhurmës së krijuar jashtë fushe, Liverpooli e nisi mirë ndeshjen, me Curtis Jones që testoi Yann Sommer në fillim dhe me Konaté që mendoi se kishte shënuar, por VAR anuloi golin për një prekje me dorë në aksionin paraprak. Pas kësaj, Inter fitoi terren dhe u afrua te goli me një goditje të fuqishme me kokë të Lautaro Martínez, të ndalur me mjeshtëri nga Alisson.

Pjesa e dytë u kthye në një betejë taktike, ku të dy mbrojtjet dominuan dhe rastet ishin të pakta. Bradley pati mundësinë më të mirë për Liverpoolin, por u ndal nga Sommer. Kur gjithçka dukej se po shkonte drejt një barazimi pa gola, Bastoni u akuzua për një tërheqje të lehtë të fanellës ndaj Wirtz, duke u dhënë anglezëve penalltinë përcaktuese. Szoboszlai nuk gaboi, duke vulosur një fitore të artë që ngjit “Reds” në vendin e tetë dhe i barazon me Interin, i cili regjistroi humbjen e dytë radhazi në Champions.