Performanca e Federico Valverde-s ka shqetësuar drejtuesit e Real Madrid-it, sipas raportimeve të ‘Defensa Central’. Presidenti Florentino Perez ka vënë re një rënie të dukshme të nivelit të mesfushorit uruguaian që nga Botërori për Klube dhe situata nuk duket se po përmirësohet me ardhjen e Xabi Alonso-s si trajner i skuadrës.

Alonso, i cili zëvendësoi Carlo Ancelotti-n, nuk ka arritur të nxjerrë maksimumin nga Valverde, duke e vendosur lojtarin në një pozicion jo tipik për të, nga mesfusha në krahun e djathtë të mbrojtjes. Edhe pse Valverde e ka luajtur këtë rol më parë, kjo situatë duket se po ndikon në performancën e tij.

Karakteri dhe përkushtimi i lojtarit janë të njohura dhe klubi shpreson që ai të rikthehet në formën e tij më të mirë në mesfushën e Real Madridit. Megjithatë, nëse gjërat nuk përmirësohen, e ardhmja e Valverdes mund të vihet në diskutim, edhe pse aktualisht drejtuesit nuk planifikojnë ta shesin.

Në këtë sfond, Manchester United është i vëmendshëm. ‘Sipas Daily Mirror’, klubi anglez po mendon të bëjë një ofertë për mesfushorin 27-vjeçar, me një vlerësim të mundshëm rreth 80 milionë euro. Një lëvizje e tillë mund të hapë spekulime të mëtejshme rreth të ardhmes së Valverdes dhe rolit të tij te Real Madrid.

Situata mbetet e ndjeshme dhe tifozët e “Los Blancos” do të ndjekin me kujdes se si do të menaxhojë Xabi Alonso talentin uruguaian në ndeshjet e ardhshme.