Zemërimi i madh i Viniciusit pas zëvendësimit të tij në “El Clásico” ndaj Barcelonës nuk do të sjellë asnjë ndëshkim për brazilianin nga Real Madridi. Në klubin “merengues” mendojnë se bëhet fjalë për një çështje të brendshme, që i takon vetëm menaxhimit të dhomave të zhveshjes nga ana e Xabi Alonsos, dhe nuk e marrin as në konsideratë ndërhyrjen në një çështje që lidhet vetëm me futbollistin dhe trajnerin e tij. Klubi e konsideron këtë temë të mbyllur pas përqafimit mes tyre gjatë festës së fitores ndaj Barcelonës.

Klubi ruan një qëndrim neutral ndaj polemikës që lindi pas zëvendësimit të Viniciusit në minutën e 72-të të ndeshjes, vendim që shkaktoi një zemërim të madh te lojtari brazilian. Në klub kuptohet reagimi i Vinit si një përgjigje impulsive ndaj frustrimit për një vendim teknik që, jo vetëm ai, por pothuaj askush në “Bernabéu” nuk e priste në atë moment të ndeshjes.

Në asnjë rast drejtuesit e Real Madridit nuk kanë ndërmend të ndërhyjnë në menaxhimin e një çështjeje që i përket vetëm trajnerit dhe sulmuesit. Për më tepër, klubi kujton se pas ndeshjes, në dhomat e zhveshjes, Xabi dhe Vinicius, së bashku me pjesën tjetër të skuadrës, i dhanë dorën njëri-tjetrit dhe festuan fitoren, si mes tyre, ashtu edhe me gjithë ekipin dhe stafin teknik. Për këtë arsye, klubi nuk e merr parasysh asnjë lloj gjobe për përfaqësuesin brazilian.

Kjo, megjithatë, nuk do të thotë se në klub u pëlqye sjellja e Viniciusit. Reali e konsideron “të panevojshme” shfaqjen që ai bëri gjatë zëvendësimit dhe pret që “të mësojë leksionin” pas polemikës që u krijua. “Është kapiteni i tretë dhe duhet të japë shembull”, komentohet në Valdebebas.

Në çdo rast, biseda e paralajmëruar midis Xabi Alonsos dhe Viniciusit, të cilën trajneri e përmendi në konferencën pas ndeshjes, ende nuk është zhvilluar. Ekipi ka dy ditë pushim përpara se të rikthehet në stërvitje të mërkurën, datë në të cilën pritet të ndodhë dialogu mes futbollistit dhe trajnerit të Real Madridit.