Në një lëvizje të papritur brenda futbollit turk, Ernest Muçi është huazuar nga Besiktashi te Trabzonspor, vetëm disa ditë para mbylljes së merkatos në Turqi.

24-vjeçari ka dhënë deklaratën e tij të parë për mediat pas transferimit, duke treguar se është plotësisht i gatshëm për sfidën e re dhe ka pasur biseda me trajnerin Fatih Tekke.

“Këtë sezon jam këtu si i huazuar, por në kontratë ekziston edhe opsioni për blerje. Dua që ky opsion të shfrytëzohet dhe do bëj më të mirën. Edhe pse nuk i njoh personalisht të gjithë lojtarët në ekip, kam informacion për secilin prej tyre. E di që kur t’i bashkohem ekipit, do të më pranojnë sikur të isha prej vitesh këtu. Jam shumë i emocionuar për të dhënë kontributin tim për ekipin,” u shpreh Muçi.

Ai shtoi se është i gatshëm të luajë në pozicione të ndryshme dhe se fleksibiliteti i tij do të jetë një avantazh për ekipin: “Jam i hapur për të luajtur në pozicione të ndryshme. Kam folur me trajnerin. Kam besim tek ai dhe besoj se do të kemi sukses. Jam plotësisht gati fizikisht. Jam në 100% të formës sime dhe mezi po e pres të nis sezonin.”

Transferimi i Muçit vjen në një moment kyç për Trabzonsporin, që kërkon të forcojë skuadrën në ditët e fundit të merkatos turke.