Trajneri spanjoll, Luis Enrique Martínez, është shtruar në spital pasi pësoi një aksident teksa po ngiste biçikletën, një nga pasionet e tij të mëdha jashtë futbollit. Ngjarja ndodhi këtë të premte dhe, për shkak të dëmtimit, ai u dërgua menjëherë në urgjencë.

Në një komunikatë zyrtare, Paris Saint-Germain bëri të ditur se trajneri spanjoll do t’i nënshtrohet një ndërhyrjeje kirurgjikale për shkak të një frakture në klavikul.

Klubi francez shprehu gjithashtu “mbështetje të plotë” për trajnerin, duke i uruar “shërim sa më të shpejtë”. Aksidenti ndodhi gjatë pushimit të kombëtareve, ndërsa PSG ka përpara ndeshjen e kampionatit kundër Lens-it më 14 shtator dhe debutimin në Champions League më 17 shtator kundër Atalantës.

Në kampionat, skuadra pariziene ka bërë një nisje perfekte me tri fitore në tri ndeshjet e para, duke grumbulluar nëntë pikë, mes tyre edhe fitoren 3-6 në fushën e Toulouse.

PSG bëri të ditur se do të publikojë më shumë informacione në orët në vijim. Kjo nuk është hera e parë që Luis Enrique pëson aksident me biçikletë: në vitin 2016, gjatë periudhës kur drejtonte Barcelonën, ai pati një tjetër rënie.