Legjenda e Real Madridit, Raúl González, mund të rikthehet në futbollin gjerman, këtë herë si trajner. Sipas asaj që raporton gazeta spanjolle MARCA, ish-sulmuesi është një nga kandidatët për të marrë drejtimin e Bayer Leverkusenit, duke zëvendësuar Erik Ten Hag.

Raúl u largua nga stoli i Real Madrid Castilla këtë verë dhe aktualisht është në kërkim të një aventure të re për të vazhduar karrierën si trajner. Përveç tij, emrat e Edin Terzic dhe Marco Rose janë gjithashtu në listën e mundshme të drejtuesve të Leverkusenit.

Klubi gjerman po kalon një periudhë rindërtimi pas largimit të Xabi Alonsos, i cili u kthye në Spanjë për të marrë drejtimin e Real Madridit.

Raúl gëzon një reputacion të fortë në Gjermani falë eksperiencës së tij si lojtar te Schalke 04 në fillim të viteve 2010. Edhe pse i mungon eksperienca në nivelet më të larta të stolit, ai ka treguar potencial të madh në punën e tij me ekipet e të rinjve të Real Madridit. Kujtojmë se nën drejtimin e tij, të rinjtë e Madridit U-19 fituan të vetmen UEFA Youth League në historinë e klubit.

Nëse marrëveshja konkretizohet, Raúl do të ketë mundësinë të debutojë si trajner në Bundesligë, një kampionat që e njeh mirë dhe ku la gjurmë si lojtar.