Leipzigu është gati të përballet me një largim të bujshëm. Xavi Simons, një nga ‘yjet’ më premtues të skuadrës gjermane, është shumë pranë transferimit te Chelsea. Largimi i tij pritet të zyrtarizohet menjëherë pas ndeshjes së parë të Bundesligës kundër Bayernit, duke lënë një boshllëk të madh në organikën e trajnerit Marco Rose.

Pikërisht për këtë arsye, drejtuesit e Leipzigut janë vënë menjëherë në lëvizje për të gjetur një zëvendësues të denjë. Sipas Sky Deutschland, objektivi kryesor është mesfushori i Liverpool-it, Harvey Elliott. Talenti anglez i lindur në vitin 2003 shihet si profili ideal për të marrë rolin e Simons, falë teknikës së rafinuar dhe vizionit të lojës që e bëjnë të përshtatshëm për rolin e trekuartistit.

Bisedimet mes palëve kanë avancuar ndjeshëm. Raportohet se Leipzigu ka arritur një marrëveshje parimore me përfaqësuesit e lojtarit, ndërsa edhe Liverpool nuk do të bënte rezistencë në rast se do të paraqitej një ofertë e konsiderueshme. Tashmë gjithçka varet nga klubet, të cilat duhet të përcaktojnë shifrën përfundimtare të transferimit.

Nëse marrëveshja mbyllet, Leipzigu do të sigurojë një tjetër talent për sulmin, duke i dhënë trajnerit Rose alternativa të reja në prag të një sezoni që pritet të jetë shumë i kërkuar si në Bundesligë ashtu edhe në arenën europiane.