Pas shtatë vitesh të suksesshme me fanellën e Eintracht Frankfurt, Kevin Trapp i ka dhënë fund aventurës së tij në Gjermani. Portieri 35-vjeçar, me 287 ndeshje të zhvilluara, ka zgjedhur si destinacion të ri Paris FC, klub që këtë verë është ngjitur në Ligue 1. Transferimi u mbyll për 1 milion euro, ndërsa lojtari kreu me sukses vizitat mjekësore dhe nënshkroi një kontratë trevjeçare.

Kthimi i Trapp në Francë nuk është i rastësishëm. Ai ka luajtur më parë për Paris Saint-Germain, ku fitoi të gjitha trofetë kombëtarë, ndërsa tashmë kthehet në kryeqytet edhe për arsye personale. Bashkëshortja e tij, modelja braziliane, Izabel Goulart, jeton në Paris dhe sipas medieve franceze ka qenë faktori vendimtar për pranimin e ofertës.

Në këtë marrëveshje ndikoi edhe një detaj i veçantë. Familja Arnault, aksionere kryesore e Paris FC dhe pronare e shtëpisë së modës Louis Vuitton, e joshi portierin me një ofertë të veçantë: pas përfundimit të karrierës, Trapp mund të bëhet një nga imazhet e markës luksoze. Një “kartë” jofutbollistike, por që rezultoi vendimtare për arritjen e akordit.

Paris FC ka shpenzuar tashmë 45 milionë euro këtë merkato dhe pritet të afrojë edhe një mesfushor, një mbrojtës krahu dhe një sulmues. Megjithatë, transferimi i Trapp mbetet më i bujshmi, jo vetëm për emrin e lojtarit, por edhe për mënyrën e pazakontë se si u arrit.

Gjatë karrierës, Trapp ka mbrojtur portën e Kaiserslautern, Eintracht Frankfurt (në dy periudha) dhe PSG, duke fituar Europa League në vitin 2022 me gjermanët dhe duke zhvilluar nëntë ndeshje me kombëtaren e Gjermanisë.