Interi ka arritur të triumfojë 2-1 në miqësoren kundër Monacos, duke përmbysur rezultatin dhe duke luajtur mbi një orë me një lojtar më pak. Monaco kaloi në avantazh pas vetëm dy minutash falë golit të Akliouche, ndërsa në minutën e 30-të Calhanoglu u ndëshkua me kartonin e dytë të verdhë, një vendim i diskutueshëm i arbitrit francez Mathieu Vernice.

Pavarësisht inferioritetit numerik, skuadra e Cristian Chivu reagoi me karakter. Në pjesën e dytë, Lautaro Martínez barazoi me një goditje të saktë, duke treguar instinkt dhe vendosmëri. Më pas, sulmuesi i ri francez, Bonny, i futur nga stoli, realizoi golin e fitores pas një aksioni individual spektakolar, ku fillimisht fitoi topin dhe më pas shmangu disa mbrojtës para se të shënonte.

Interi, që doli në fushë me formacionin klasik 3-5-2, tregoi momente të mira qarkullimi topi dhe organizimi, edhe pse u vu shpesh në vështirësi nga presioni i Monacos. Sommer u tregua vendimtar në disa raste, ndërsa Barella dhe Thuram patën mundësi të mira për të shënuar në pjesën e parë.

Kjo ishte fitorja e dytë radhazi për zikaltrit pas asaj kundër skuadrës U-23, duke dhënë sinjale pozitive në prag të sezonit të ri. Performanca e Lautaros dhe Bonny-t lë të kuptohet se repartit ofensiv i është shtuar cilësi dhe freski, duke zbutur nevojën urgjente për afrime të tjera.

Rezultati final: Monaco 1 – 2 Inter.

Golashënuesit: 2’ Akliouche (M), 54’ Lautaro (I), 78’ Bonny (I).