Shkëndija e Tetovës e nisi me humbje fazën e tretë kualifikuese të Ligës së Kampionëve, duke u mposhtur 1-0 nga Qarabağu në ndeshjen e parë të luajtur në Shkup.

Shkëndija Tetovë - Qarabag 0-1

Pjesa e parë nisi me ritëm të ulët, por u ndez në minutën e 18-të kur miqtë kaluan në avantazh. Fillimisht u akordua një goditje dënimi pas një faulli të Ronald Ëebster, por pas rishikimit me VAR, u vendos të akordohet penallti. Edhe pse Qarabağu kishte humbur dy penallti në tri ndeshjet e fundit, Toral Bayramov u tregua i saktë, duke goditur në cepin e sipërm të portës dhe duke u dhënë miqve epërsinë.

Shkëndija reagoi menjëherë me raste nga Besart Ibraimi dhe Endrit Krasniqi, por të dy u ndalën nga portieri Mateusz Kochalski. Loja mori ritëm të lartë me raste në të dyja portat, ndërsa edhe portieri i Shkëndijës, Baboucarr Gaye, u shqua me një pritje fantastike ndaj Zoubir, që rrezikoi seriozisht portën.

Në pjesën e dytë, cilësia në fazën sulmuese ra disi, por Shkëndija iu afrua golit me një goditje të Fabrice Tamba që u ndal nga Kochalski. Gaye sërish mbajti gjallë shpresat për ekipin nga Tetova me një pritje vendimtare ndaj Zoubir.

Në minutat e fundit, të dy portierët u vunë sërish në provë, duke ndalur përpjekjet e rrezikshme të Ibraimit dhe Zoubir. Me këtë rezultat, Qarabağu ruan një avantazh të ngushtë për ndeshjen e kthimit, duke zgjatur në gjashtë ndeshje rekordin pozitiv kundër skuadrave nga Maqedonia e Veriut.