Një organizatë holandeze në mbrojtje të të drejtave të futbollistëve ka nisur një padi kolektive ndaj FIFA-s dhe pesë federatave kombëtare të futbollit, duke i akuzuar për shkelje të ligjeve të BE-së mbi konkurrencën dhe lirinë e punësimit. Lëvizja vjen pas një vendimi të rëndësishëm të Gjykatës Evropiane të Drejtësisë (GJED), i cili nxori në pah se rregullat e FIFA-s për ndërprerjen e kontratave janë në kundërshtim me të drejtën evropiane.

Padia është ndërmarrë nga fondacioni Justice for Players, i cili përfaqëson interesat e futbollistëve profesionistë meshkuj dhe femra që kanë luajtur në klubet e Bashkimit Evropian apo Mbretërisë së Bashkuar që nga viti 2002. Ata pretendojnë se rregullat aktuale të FIFA-s kanë kufizuar të ardhurat e lojtarëve për më shumë se dy dekada.

Objekt i padisë janë FIFA dhe federatat e futbollit të Holandës, Francës, Gjermanisë, Belgjikës dhe Danimarkës.

“Sipas vlerësimeve fillestare, afërsisht 100,000 lojtarë mund të jenë prekur nga këto rregullore të paligjshme,” – thuhet në deklaratën e fondacionit.

Kryetarja e Justice for Players, Lucia Melcherts, shtoi:

“Të gjithë futbollistët profesionistë kanë humbur të ardhura për shkak të rregullave të padrejta të FIFA-s. Sistemi i kaluar dhe madje edhe ai aktual, favorizon në mënyrë të pabarabartë FIFA-n, e cila gëzon fuqi të njëanshme të tepruar. Në çdo profesion tjetër, njerëzit kanë të drejtë të ndërrojnë vend pune në mënyrë të lirë.”

Rasti ‘Diarra’, themeli i sfidës ligjore

Rasti ligjor është i lidhur me ish-lojtarin e Real Madridit, Arsenalit dhe Chelsea-t, Lassana Diarra, i cili në vitin 2013 shkëputi kontratën me Lokomotivën e Moskës për shkak të mosmarrëveshjeve mbi pagën. FIFA dhe Gjykata e Arbitrazhit Sportiv e detyruan Diarra-në të paguante 10.5 milionë euro dëmshpërblim. Ai argumentoi se kjo i pamundësoi transferimin, pasi çdo klub i ri do të mbartte barrën financiare të gjobës.

GJED vendosi se rregulloret e FIFA-s cenojnë konkurrencën dhe kufizojnë lirinë e punësimit, duke i dhënë kështu një goditje ligjore autoritetit të FIFA-s në këtë aspekt. Disa e kanë krahasuar këtë vendim me rastin Bosman (1995), i cili ndërpreu pagesat e transferimeve për lojtarët që përfundonin kontratat brenda BE-së.

Humbje ekonomike për lojtarët

Sipas një analize ekonomike të Compass Lexecon, lojtarët e prekur kanë fituar mesatarisht 8% më pak gjatë karrierës së tyre për shkak të këtyre rregullave. Megjithatë, vendimi ‘Diarra’ nuk ka sjellë ende ndryshime strukturore në tregun global të transferimeve, që vlen mbi 8.6 miliardë euro në vit.

Padia e Justice for Players pritet të trazojë ujërat e sistemit të transferimeve në futboll dhe të nxisë një rishikim të thellë të politikave të FIFA-s mbi kontratat dhe lëvizjen e lojtarëve.