Në emisionin "Despierta San Francisco" në Radio MARCA, gazetari Miguel Ángel Toribio bëri një përmbledhje të pesë dështimeve më të mëdha të historisë së Real Madridit në merkato, duke u bazuar në çmimin, pritshmëritë dhe rendimentin e lojtarëve. Dhe në një klub me 15 Champions, edhe emrat më të mëdhenj nuk kanë shpëtuar nga lista e zhgënjimeve.

5. JULIEN FAUBERT

I huazuar nga West Ham për vetëm 1.5 milionë euro në janar 2009, luajti vetëm 54 minuta me fanellën e Real Madridit. Momenti i tij më i famshëm? Fjeti në stol gjatë një ndeshjeje në “Bernabéu”. Toribio e cilëson si një “blerje ikonike më shumë se të kushtueshme”, një arsye pse Madridi mbetet skeptik ndaj merkatos së dimrit.

4. ROBERT PROSINECKI

I ardhur në vitin 1991 si ‘yll’ i Crvena Zvezdës dhe i konsideruar si pasardhësi i Maradonës në Ballkan, kushtoi 450 milionë peseta. Por, midis dëmtimeve të shpeshta, duhanit dhe vetëm 76 ndeshjeve në 3 sezone, mori pseudonimin “Lesioneski”. Më vonë luajti edhe për Barcelonën, pa shkaktuar ndonjë polemikë në Madrid. Madje, karriera e tij u kthye në objekt satire në reklama.

3. MANOLO CANABAL

Real Madridi pagoi 800 milionë peseta për sulmuesin, por asnjëherë nuk debutoi zyrtarisht me ekipin. U kërkua nga trajneri Capello, por ky i fundit u largua përpara se Canabal të kishte një shans. I vetmi kujtim: një gol në Trofeun "Bernabéu" dhe një huazim i shpejtë te Valladolid. “Kushtoi më shumë se Roberto Carlos apo Seedorf, kjo mjafton,” tha Toribio.

2. KAKÁ

Fitues i Topit të Artë dhe ‘yll’ i Milanit, u transferua në 2009 për 67 milionë euro. Por mes pubalgjive, operacioneve dhe mungesës së lidershipit përkrah Ronaldos, Kaka nuk arriti kurrë nivelin e pritur. Shënoi 29 gola në 120 ndeshje, por nuk u bë kurrë trekuartisti që klubi priste. “Ishte një blerje që duhej bërë... por që doli keq”, u shpreh Toribio.

1. EDEN HAZARD

“Galaktiku” i vitit 2019. Blerja më e shtrenjtë në historinë e klubit: 120 milionë euro. Erdhi me mbipeshë, u dëmtua rëndë kundër PSG-së dhe kurrë nuk u rikuperua. Vetëm 7 gola në 76 ndeshje. Megjithatë, u largua pa kërkuar asnjë qindarkë. “Te Chelsea kishte cilësinë e Messit, por në Madrid u shua menjëherë,” tha Toribio. Madje, pas fitores së Champions-it të 14-të, premtoi një rikthim të madh, por ajo mbeti thjesht një deklaratë.

Përmbyllja e Toribios:

“Nëse muzeu i Real Madridit ka vend për 15 Champions, ka vend edhe për këto 5 transferime që nuk ndryshuan asgjë, përkundrazi lanë pas miliona të humbura dhe zemra të thyera.”