Tottenham Hotspur ka zyrtarizuar afrimin e mesfushorit portugez João Palhinha nga Bayern Munich, në formë huazimi për një sezon, me të drejtë blerjeje për 30 milionë euro në verën e vitit 2026.

Palhinha, 30 vjeç, rikthehet kështu në Londër, një vit pasi ishte larguar nga Fulham-i drejt Bundesligës. Te Bayern-i shkoi për një shumë prej 50 milionë eurosh pas dy sezoneve të shkëlqyera në Premier League nën drejtimin e trajnerit Marco Silva.

Megjithatë, eksperienca në Gjermani nuk rezultoi aq e suksesshme: portugezi u aktivizua në 25 ndeshje në total, por vetëm 9 si titullar. Edhe pse fillimisht kishte shprehur dëshirën për të luftuar për një vend në formacionin e kampionëve të Gjermanisë, Palhinha ka vendosur të transferohet sërish në Angli për të kërkuar më shumë hapësira.

Welcome to Tottenham Hotspur, João Palhinha 🇵🇹 pic.twitter.com/aTAYVaujyU

— Tottenham Hotspur (@SpursOfficial) August 3, 2025

Te Tottenham-i, ai pritet të rivalizojë për një vend në mesfushë me Pape Sarr dhe Yves Bissouma, duke sjellë eksperiencën dhe cilësitë që e bënë një nga mesfushorët më të vlerësuar në Angli.

Në sezonin 2023/24, Palhinha ishte lojtari me më shumë ndërhyrje të suksesshme në Premier League dhe i treti për duel fituar, tregues të qartë të profilit të tij si shkatërrues loje. Nëse arrin të rikthejë këto paraqitje edhe me fanellën e Spurs, klubi londinez mund ta blejë përfundimisht verën e ardhshme.