Pas një mungese të gjatë për shkak të dëmtimit në gju të pësuar në muajin mars gjatë Final Four të CONCACAF Nations League, Alphonso Davies është rikthyer zyrtarisht në stërvitje në fushë me Bayern Munich.

Klubi gjerman e konfirmoi lajmin përmes disa postimeve në rrjetet sociale, duke vlerësuar ritmin mbresëlënës të rikuperimit të mbrojtësit kanadez. Pesë muaj pas dëmtimit që e detyroi të mbyllte sezonin përpara kohe dhe të humbiste pjesëmarrjen në Gold Cup dhe në Botërorin e Klubeve, Davies është kthyer në fushë, edhe pse aktualisht kryen vetëm ushtrime të lehta dhe pa top.

Në një video të publikuar nga Bayerni, Davies tha:

"Ndihem shumë mirë. Në muajt e parë vetëm mund të ecja, tani mund të vrapoj, edhe pse ngadalë. Është një hap i madh përpara." Ai theksoi se dëshiron të rikthehet me kujdes dhe pa nxitim, duke forcuar muskujt para se të kalojë në fazën tekniko-taktike të përgatitjes:

"Më pëlqen të vrapoj shpejt, por e di që duhet të jem i duruar. Tani objektivi është të forcoj këmbën dhe të monitoroj reagimet e trupit pas çdo seance."

Bayern Munich po ndjek me vëmendje përparimin e njërit prej lojtarëve më të rëndësishëm të skuadrës, në prag të fillimit të sezonit të ri. Kthimi i Davies është një sinjal pozitiv për trajnerin dhe tifozët, që presin rikthimin e plotë të shpejtësisë dhe energjisë së tij në krahun e majtë të mbrojtjes.