Një ngjarje e rëndë ka tronditur opinionin publik në Shtetet e Bashkuara, pasi Shane Devon Tamura, 27 vjeç, vrau të paktën katër persona në një ndërtesë në Manhattan, ku ndodhen zyrat e National Football League (futboll amerikan), përpara se t’i jepte fund jetës. Ajo që e bën ngjarjen edhe më shqetësuese është letra e vetëvrasjes që Tamura la pas, në të cilën ai akuzon NFL-në si shkaktare të degradimit të tij mendor dhe fizik.

Tamura, një ish-lojtar futbolli amerikan me origjinë nga Hawaii dhe banues në Nevada, kishte me vete një letër trefaqëshe në xhepin e pasmë, ku shpreh qartë se vuante nga Encefalopatia Traumatike Kronike (ETK), një sëmundje neurodegjenerative e lidhur me goditjet e shumta në kokë që pësojnë lojtarët e futbollit amerikan.

“Futbolli më shkaktoi ETK. Më bëri të pija litra me anticongelant,” shkruante ai në letrën e tij, duke iu referuar edhe rasteve të tjera të ngjashme si ai i Terry Long, një ish-lojtar i Pittsburgh Steelers, që vrau veten në 2005, dhe që gjithashtu vuante nga ETK.

Tamura kërkoi në mënyrë eksplicite që truri i tij të studiohej pas vdekjes, në mënyrë që “të kuptohej më mirë kjo sëmundje e tmerrshme.” Ai shprehu gjithashtu ndjesë për veprimet e tij:

“Më vjen keq. Më vjen keq për gjithçka,” thuhej në fund të letrës.

Policia konfirmoi se Tamura kishte histori të dokumentuar të problemeve të shëndetit mendor. Gjatë sulmit të përgjakshëm në ndërtesën e NFL-së, humbi jetën një oficer policie jashtë shërbimit dhe u plagosën disa të tjerë.

Tragjedia ka ndezur sërish debatin për lidhjen mes sportit të futbollit amerikan dhe dëmtimeve të rënda në tru. Ekspertët kanë paralajmëruar për vite se ETK nuk ka shërim dhe ndikon në sjelljen impulsive, paqëndrueshmërinë emocionale dhe humbjen e aftësive sociale.

Edhe pse NFL-ja fillimisht mohoi rrezikun e goditjeve të shumta në kokë, pas vitit 2009 pranoi se dëmtimet mund të shkaktojnë pasoja afatgjata. Por rastet si ky i Tamura-s tregojnë se sfida mbetet serioze dhe e pazgjidhur.