Edhe pse ka mbyllur një kapitull të rëndësishëm me Milanin dhe është transferuar tek Al Hilal, në Arabinë Saudite, Theo Hernandez nuk e ka harruar figurën që i ndryshoi karrierën: Paolo Maldini. Mbrojtësi francez ka postuar së fundmi në Instagram një foto domethënëse gjatë pushimeve në Sardenjë, ku shihet duke parë një fanellë të zezë me portretin e Maldinit në qendër dhe mbishkrimin “Capitano” poshtë saj, një homazh i heshtur, por shumë i fuqishëm për ish-drejtuesin kuqezi.

Lidhja mes Theo Hernandezit dhe Paolo Maldinit është e veçantë dhe e njohur në ambientin e Milanit. Ishte pikërisht Maldini që e bindi francezin të transferohej në Milano në vitin 2019, në një takim vendimtar në Ibiza. Prej asaj dite, karriera e Theos mori hov: ai jo vetëm u bë një nga mbrojtësit më të mirë në botë në pozicionin e tij, por edhe kapiten i Milanit, ashtu si legjenda e klubit që e kishte sjellë.

Në janar të këtij viti, Theo u bë mbrojtësi me më shumë gola në historinë e Milanit në Serie A, duke thyer rekordin e mbajtur pikërisht nga Paolo Maldini. Ky moment simbolik u shoqërua nga një gjest i madh: Maldini i dhuroi një fanellë me numrin 3 dhe një dedikim emocional ku shkruhej: “Për Theon, pasardhësin tim të denjë. Të dua.”

Edhe në lamtumirën e Theos nga Milani, ndikimi i Maldinit nuk mungoi. “Do të na mungosh shumë, Theo. Të dua”, ishte mesazhi i shkurtër, por prekës i legjendës italiane. Një marrëdhënie që i ka kaluar kufijtë e një bashkëpunimi profesional dhe që vazhdon të mbijetojë edhe në largësi, në një vend të ri, me një fanellë të re.

Theo e përjetoi shpërthimin e tij futbollistik nën hijen dhe kujdesin e një emri që për Milanin është më shumë se histori. Largimi i tyre nga klubi ndodhi në mënyra të ndryshme, por respekti dhe dashuria që ndajnë për njëri-tjetrin mbeten të pandryshuara, një lidhje e rrallë, që vazhdon të jetojë edhe përtej kufijve të Milanellos.