Një tjetër lajm i mirë për të ardhmen e futbollit shqiptar vjen nga Torino: Raffaele Huli do të vazhdojë të jetë pjesë e gjigantit italian Juventus. Portieri i talentuar, i cili është edhe pjesë e Kombëtares shqiptare U-17, ka firmosur një kontratë të re me klubin, duke zgjatur bashkëpunimin deri më 30 qershor 2028.

16-vjeçari shqiptar ka bërë hapa të mëdha në zhvillimin e tij që prej momentit kur iu bashkua Juventusit në korrik të vitit 2024. Fillimisht pjesë e ekipit U-17, ai ka bindur drejtuesit e klubit me paraqitjet e tij dhe tashmë ka kaluar një nivel më lart, duke u bërë pjesë e ekipit U-20 të "Zonjës së Vjetër". Një sinjal i qartë për besimin që klubi ka ndaj potencialit të tij.

Përveç suksesit në klub, Huli ka spikatur edhe me fanellën kuqezi. Deri tani, ai ka grumbulluar 10 paraqitje me Kombëtaren shqiptare U-17, ku ka treguar pjekuri, siguri dhe refleks të shkëlqyer mes shtyllave, cilësi që e bëjnë një prej emrave më premtues në portën e Shqipërisë për të ardhmen.

Ky rinovim i rëndësishëm nuk është vetëm një ogur i mirë për karrierën e Hulit, por edhe një tregues se talentet shqiptarë po marrin gjithnjë e më shumë besim në akademitë elitare të futbollit evropian. Me këtë hap të madh, portieri nga Shqipëria është në rrugën e duhur për të ndjekur hapat e legjendave dhe për të ndërtuar një karrierë të ndritur në futbollin ndërkombëtar.