Një video e sulmit të armatosur ndaj luftëtarit dagestanas të arteve marciale të përziera (MMA), Timur Khizriev, është publikuar sot nga kanali "Mash Gor" në Telegram, duke hedhur dritë mbi momentet dramatike të ngjarjes që ndodhi mbrëmjen e 15 korrikut në qytetin Makhachkala, Rusi.

Sipas raportimeve të "Kavkazsky Uzel", dy persona të maskuar e pritën në pritë Khizrievin në rrugën Daniyalov, pikërisht në oborrin e banesës së tij. Në momentin që sportisti doli nga makina, autorët hapën zjarr ndaj tij, duke e qëlluar disa herë.

Pamjet filmike, të regjistruara nga një kamerë sigurie, tregojnë momentin kur Khizriev zbret nga SUV-i i tij, dhe një person i afrohet me shpejtësi për ta qëlluar. Pas një përleshjeje trup me trup, të dy përfundojnë në tokë dhe në atë moment i bashkohet edhe një agresor i dytë, i cili gjithashtu hap zjarr ndaj Khizriev.

Pasi arrin të ngrihet, luftëtari tenton të largohet me vrap, por njëri prej agresorëve e qëllon edhe dy herë të tjera nga pas.

Timur Khizriev u dërgua menjëherë në spital, ku iu diagnostikuan pesë plagë me armë zjarri. Gjendja e tij shëndetësore raportohet si e qëndrueshme.

Sipas përshkrimit të publikuar bashkë me videon, sulmi dyshohet se ka lidhje me një konflikt të vjetër. Megjithatë, deri në orën 06:50 me orën lokale të Moskës, Ministria e Brendshme e Dagestanit nuk kishte lëshuar ende ndonjë deklaratë zyrtare mbi ngjarjen.

Khizriev është një emër i njohur në botën e MMA-së, me përvoja në evente si PFL, Bellator dhe turne të tjerë ndërkombëtarë.

Ngjarja ka shkaktuar reagime të shumta në rrjetet sociale dhe në komunitetin sportiv të rajonit, ndërsa pritet që autoritetet të hedhin më shumë dritë mbi motivet dhe autorët e atentatit.