Lajme inkurajuese vijnë nga Belgjika për Milanin në lidhje me Ardon Jasharin. Edhe pse ende nuk ka një “po” zyrtare nga Club Brugge për transferimin e mesfushorit zviceran, lëvizja më e fundit shihet si një sinjal pozitiv nga drejtuesit e klubit kuqezi.

22-vjeçari është përjashtuar nga lista e lojtarëve që do të udhëtojnë drejt Skocisë për të zhvilluar një ndeshje miqësore kundër Rangers, të dielën. Arsyeja lidhet me merkaton, pasi një vendim i ngjashëm është marrë edhe për mbrojtësin De Cuyper, i cili është pranë transferimit te Brighton.

Jashari do të qëndrojë në qendrën stërvitore të Brugge gjatë javës së ardhshme, ku do të stërvitet individualisht. Nuk bëhet fjalë për ndonjë përplasje me klubin, por për një vendim të ndërmjetëm që pasqyron edhe presionin që vetë lojtari po ushtron për të realizuar kalimin te Milan. Ai e ka bërë të qartë dëshirën e tij: dëshiron të vishet kuqezi.

Oferta e Milanit është 33 milionë euro plus 5 milionë bonuse, shumë që nuk është larg nga kërkesa totale e Brugge prej 40 milionë eurosh me gjithçka të përfshirë.

Ndërkohë, Milani, që tashmë ka siguruar shërbimet e Samuele Ricci-t për mesfushën, nuk ka ndërmend të presë pafundësisht. Klubi italian do të japë edhe disa ditë kohë, por nuk planifikon të rrisë ofertën. Ndërsa Jashari, i vendosur për këtë hap në karrierë, mezi pret të mbërrijë në Milano dhe të veshë fanellën e “Djallit”.