Inter Miami zyrtarizoi nënshkrimin e kapitenit të Barcelonës, Sergi Busquets, i cili do të ribashkojë mesfushorin me përvojë me ish-shokun e skuadrës Lionel Messi.

Busquets njoftoi në maj se do të largohej nga Barcelona pas 18 vitesh në klub (akademia+ekipi i parë) dhe pas spekulimeve të shumta tashmë është zyrtarizuar transferimi i tij te Inter Miami.

Mesfushori në këtë mënyrë do të takohet sërish me sulmuesin argjentinas Lionel Messi (35), i cili konfirmoi këtë muaj se po kalon te Inter Miami nga PSG.

Busquets dhe Messi kaluan 13 sezone së bashku te Barca nga 2008 deri në 2021 dhe ishin pjesë e një skuadre të suksesshme që fitoi tre Liga të Kampionëve, tetë tituj të La Ligës dhe gjashtë Copa del Rey.

Ish-përfaqësuesi spanjoll kishte oferta edhe nga Arabia Saudite, por ai donte të luante sërish me Messin dhe vendosi të transferohej në klubin e Miamit në pronësi të David Beckham.

Busquets luajti gjithsej 722 ndeshje për Barcelonën, që është numri i tretë më i madh i paraqitjeve në historinë e klubit.

Gjatë 15 viteve të tij në ekipin e të rriturve, ai shënoi 18 gola dhe regjistroi 40 asistime.