Brazili i ka dërguar zyrtarisht një notë proteste ambasadorit spanjoll dhe ka njoftuar se do të bëjë një ankesë zyrtare pranë autoriteteve në Madrid për shkak të abuzimit të ri racist të drejtuar ndaj futbollistit brazilian Vinicius Junior.

Vinicius ishte në shënjestër të tifozëve gjatë ndeshjes së Realit kundër Valencias të dielën.

Qeveria braziliane njoftoi se Ministrja e Barazisë Racore Anielle Franco do të paraqesë një ankesë zyrtare tek autoritetet spanjolle dhe La Liga.

Ndërkohë, një burim nga Ministria e Punëve të Jashtme i tha AFP se qeveria kishte protestuar ndaj ambasadorit spanjoll në Brazil.

“Ambasadori spanjoll është larg nga Brasilia, por ne kemi qenë në kontakt me të me telefon për të shprehur pakënaqësinë e qeverisë braziliane për sulmet e përsëritura raciste ndaj Vinicius dhe nevojën për një përgjigje adekuate”, tha burimi.

Në shenjë mbështetjeje, statuja e Krishtit Shëlbues në Rio de Zhaneiro nuk u ndriçua për një orë të hënën mbrëma.

Përgjegjësit për statujën thanë se gjesti ishte "një simbol i luftës së përbashkët kundër racizmit dhe solidaritetit me lojtarin dhe të gjithë ata që vuajnë nga paragjykimet në botë".

"E zezë dhe imponuese. Por, mbi të gjitha, dua të frymëzoj dhe të sjell më shumë dritë në luftën tonë," shkroi Vinicius në Twitter për këtë lëvizje të kryepeshkopatës dhe falënderoi të gjithë për mbështetjen e tyre.

Ndeshja e së dielës në Valencia u ndërpre pak minuta pasi Vinicius, i cili ka qenë vazhdimisht në shënjestër të abuzimeve racore në Spanjë, u keqtrajtua sërish nga tribuna.

Arbitri shkroi në raportin e tij pas ndeshjes se britmat e “majmunit” i drejtoheshin lojtarit.

Presidenti i Brazilit Luiz Inacio Lula da Silva dënoi sjelljen raciste, e cila tërhoqi një mbështetje të madhe për Vinicius, duke përfshirë yjet brazilianë Neymar dhe Richarlison dhe legjendën në pension Ronaldo.